20/09/2002 今日放AL,晏晝出左旺角,買史歷奇新出既鋼帶錶! 好靚架! 然後就同小威佢地去左創興既幸福樓打邊爐! 不過冇乜野食! 之後再落尖沙咀飲野,不過飲左一陣,琪琪就話想去唱K,於是我同佢同埋老霖三個去左big echo唱,終於唱到d想唱好耐既歌啦!! 今晚又玩通頂,主要原因係琪琪唔開心,我要陪佢.

19/09/2002 返埋今日,終於可以放三日假! 夜晚約左大頭食飯,因為佢話佢有心事同我傾, 點知佢好遲都未收得工,好彩男朋友出左旺角陪我行左一陣o者! 之後8點幾,大頭黎到,男朋友就返屋企啦! 我同大頭傾左兩個半鐘先各自返屋企.

18/09/2002 今日完全唔想笑! 放工之後,好想去行下街,散下心. 好想去沙田新城市廣場既迪士尼睇下woody既野,好可惜,做到19:00先收得工,於是冇去到沙田,只係o係荃灣千色店行左一陣. 後來阿妹收工打比我,就一齊食埋飯先返屋企. 呢期好悶呀~~ 真係好悶......

17/09/2002 今日又為左公事而喊,唉!我都唔知點講,唔係因為太多野做而覺得辛苦,總之有時覺得自己似一碌廢柴啦! 但係事實上,我唔係. 算啦! 可能o係呢邊返工,所做既野.完全冇成功感. 不過,為左份人工,都要繼續捱架啦!

16/09/2002 又落大雨啦! 好乞人憎! 放工去左玩瑜珈,之前我已經走左兩堂架啦! 見今日精精神神咪返囉! 點知放工依然落大雨,仲大過朝早,玩完返屋企果時,淋到成身濕哂,然後仲要坐冷氣巴,成個人打哂冷震! 一返到屋企,即刻沖個熱水涼先至舒服d咋! 小威已經幫我約哂人星期五去食飯,仲建議去睇戲添! 我諗我食完飯頂多睇完戲就會返屋企休息啦! 我而家已經唔可以玩得咁顛, 因為身體實在頂唔住.

15/09/2002 一訓訓到今朝09:00. 總共訓左15個鐘! 訓醒之後,就好似發左一場惡夢咁,之前上我身果隻鬼都好似離開左我咁,我又變返以前一樣咁精靈啦!

14/09/2002 過去一個星期, 我覺得自己好似鬼上身一樣,個人變得好無常,好暴燥,仲成日發脾氣,根本就唔係平日既我. 今日放工後, 返左屋企訓教, 18:00開始訓......

13/09/2002 公司好多野做,個人好悶......嗚嗚...烈火雄心終於大結局啦...點會咁架? 紀德點會死架...??好傷心呀...我o係屋企喊左出黎...

12/09/2002 放工同男朋友出左旺角食飯,不過淨係我食咋,佢成日都唔食飯,因為佢屋企成日都留左飯比佢.然後佢陪我搭車返屋企,佢仲買左盒月餅比我媽咪添.

11/09/2002 今日吐露港大塞車,成10:00先返到公司,足足遲左一粒鐘. 然後12:00有消息話兩粒鐘後改掛8號風球,於是13:00就可以走,因為13:00係lunch time. 男朋友由觀塘過黎荃灣同我食lunch,食完陪我搭車返屋企.