2002年09月25日
其實我覺得自己唔係一個好ｏ既女朋友，其實我好小氣嫁，好易呷醋。今日真係有ｏ的唔開心，佢冇打過畀我，如果我唔搵佢，佢會唔會搵我呢？點解每次我打親畀佢，佢都傾緊電話？同佢傾緊ｏ個個係男仔定係女仔呢？我知道冇權要佢唔同其他人傾電話，不過真係好唔開心，好心痛。點解自己ｏ既男朋友寧願同其他人傾都唔搵我呢？係咪我做得唔夠好？佢開始覺得我煩？其實我真係好驚，好驚佢會覺得我煩住佢，我唔想令到佢咁辛苦，我只係想佢同我一齊會覺得開心，舒服，冇壓力。我唔知道自己有冇畀到壓力佢，但係我真係好想佢知道，我真係好介意佢對個個人都咁好。其實兩個人一齊唔一定要日日傾電話，我唔係話要佢一定要同我傾，但係我好想佢出街之前，番到屋企之後會打個電話畀我，同我講佢出街ｏ剌，番到屋企ｏ剌。好多男仔會覺得呢ｏ的係報告，佢ｏ地唔鍾意咩都畀女朋友管住，所以我唔敢要求佢咁做，而且都冇咁ｏ既權去要求佢咁做啦！知道佢咁鍾意傾電話，其實我應該開心先係，一直以ｏ黎都想搵個男朋友係鍾意傾電話，可以日日陪到我，但係佢傾電話ｏ既對象唔係我。我唔敢畀佢知道我唔鍾意，唔敢畀佢知道我介意，因為我驚，驚佢覺得我小氣，唔識諗，唔體諒佢。但係我真係控制唔到自己去亂諗ｏ野，我好驚，好驚佢會唔要我。初初以為我冇ｏ左佢都得，但係原來我不斷咁付出感情，我唔捨得放手。佢可以話係我想搵ｏ既男仔，好多ｏ野都符合我要求，不過我知道，如果真係要挽留佢，我要付出比之前ｏ既更加多。原來我發覺自己真係唔ｏ岩拍拖，我太執著ｏ剌，每一次我都叫自己唔好咁執著，放鬆ｏ的，但係唔知點解做唔到！只要佢講ｏ左一個大話，呃過我一次，就算個大話係善意ｏ既大話，我都已經唔會再信佢，我好驚有一日會咁樣對佢，我唔想知道佢呃我，我寧願咩都唔知，好過自己去亂諗ｏ野！咁樣都只會係自欺欺人，不過都好過真係知道個真相而傷心ｏ丫！
Candy_A 只跟部份人分享這資訊。
於02年9月發佈
一廂情願 (05年6月)
隨筆