10/08/2002 尋晚冇返屋企, 今日返到屋企即刻大昏迷, 訓醒就煮野食同埋上網. 男朋友今日要返工, 夜晚又要返學, 我諗佢一定好累. 聽日星期日放假, 都要同阿爸返廣州做野, 真係驚佢身體支持唔住.

09/08/2002 放工後落左銅鑼灣, 因為要接男朋友放學, 然後一齊去wet. 阿冬突然打比我, 話想同我食飯, 於是我叫埋佢一齊黎, 我地o係翠華食完飯之後, 就落左蘭桂坊, 因為約左男朋友以前o係澳洲讀書既roommate. 連埋佢d朋友,我地一行8個人,先o係musicroom飲野跳舞,跟住再落樓下鸚鵡吧猜枚劈酒,之後再去v-mix唱k.

不過, 我真係好累. 其實我唔係好鍾意過呢種生活.

08/08/2002 尋晚傾電話傾到04:00,結果訓左三個鐘,今日成日釣魚,但係又好多野做,唉,都唔知有冇做錯野添呀. 放工後,男朋友陪我去浸會醫院探阿B,佢應該住多兩日可以出院. 未到九點,阿B已經趕我地走,叫我地去拍拖,我話,之前又話我好掛住拍拖,而家黎探你又趕我去拍拖,究竟想我點...?

琪琪話我而家d日記已經唔好睇啦,因為日日都係寫男朋友,佢仲話唔夠峰迴路轉,應該寫下今日嗌交,然後聽日又好返果d咁先好睇. 哈哈! 我話我地唔興嗌交,因為大家都冇乜火,唔容易發脾氣. 跟住又比琪琪串我曬幸福,又話羡慕我......真係比佢激死呀, 不過佢仍然都係我好妹妹黎既, 比佢串多幾次都唔緊要啦!!

07/08/2002 究竟你地想我點???

06/08/2002 只係訓左三個鐘咋,好眼訓. 今朝終於遲到,因為今朝勁塞車,勁大雨, 結果遲左15分鐘. 今日仍然都係好忙,做到19:00先走...嗚嗚...真係唔抵,又冇OT,又冇補鐘...仲要減我薪,好悲哀呀!!

夜晚同男朋友同埋佢d朋友去左銅鑼灣食韓國火鍋,食完去左Juo-Bear Comic Cafe,佢地幾個男人o係度傾偈,而我就上網,覆返d留言,check返d e-mail. 不過其實我真係好眼訓呢!! 對眼好矇...

05/08/2002 又係返工既日子,不過今日都幾精神,因為尋晚好早訓. 今日返工仍然係勁忙,原本17:30收工既我,做到19:30先走得. 夜晚同老霖食飯,然後落左寶勒巷Neway pub,因為Caily生日. 男朋友都有黎陪我,飲到01:00就走,因為我聽日要返09:00. 男朋友車我返屋企,不過天氣好差,狂風暴雨, 返到屋企都成兩點幾, 又03:00先訓.

04/08/2002 今朝07:00先訓,個頭勁痛,因為尋晚我飲左D酒,唔係啤酒,係GIN酒同BAILEY. 全日都留O係屋企,因為好累好累,媽咪終於煮飯啦! 好開心,因為我聽日可以帶飯返工. 今日終於開著個電腦啦,我已經有幾日冇開電腦,冇login過key3,我唔係唔玩,更加唔會重色輕友,只係因為呢排忙於公司搬department既事,所以先唔得閒上網,再加上返朝九晚五,搞到個人好眼訓,亦都好冇精神. 總之好唔慣啦!!

03/08/2002 第一次13:00收工,不過我都唔係準時走架,做埋d野都成13:30先走得. 男朋友又係收一點,於是我落左觀塘搵佢lunch,食完lunch就上佢屋企睇下電視,夜晚仲同埋uncle一齊食飯添! 由於男朋友20:50要返學,所以我同佢20:00就離開屋企. 佢去返學,我就落尖沙咀,原本搵小威傾下偈,但係我最後變左行街買衫! 呵呵! 最後都有join埋佢地,一齊去左Neway唱K. 男朋友放學都有黎,不過今晚都唔好玩既,小威又無端端走左去,唔知佢究竟有咩事呢? 今晚同小威佢地o係寶勒巷Neway唱K,令我諗起,6月29號,"不分類眾合會所"第一次搞活動,然後我認識左呢班朋友. 相識係一種緣份,我會好好珍惜同呢班朋友既友誼.

02/08/2002 放工後,先join埋lulu,阿豹同阿茵去尖沙咀YMCA,因為我地一齊報左Kick boxing. 玩完之後20:30,我落左灣仔搵男朋友,因為佢約左兩個friend食飯同埋睇戲,叫埋我一齊去. 今晚o係灣仔食左越南野,然後去UA金鐘睇K19,睇完再落中環翠華飲杯野傾下偈. 我陪佢同埋佢d friends一共五個人坐到成兩點,其實我勁眼訓,對眼亦好累,聽日仲要返09:00,不過唔緊要啦! 我仍然好enjoy.

01/08/2002 第一日返荃灣,勁多野學,又勁多野做,唯一好處就係時間過得好快. 放工之後,同細妹去左沙田行街,因為我想買返工衫,裙同埋鞋,事關o係荃灣呢邊返工,唔可以再著T-shirt牛仔褲,總之要著得斯斯文文啦...其實我不嬲都覺得自己好斯文架,但係,最近男朋友成日話我"男仔頭",搞到我都覺得自己好唔掂. 8點幾,男朋友話出黎沙田搵我,因為想見我,但係,我好累,我知佢都好累,所以叫佢唔好出黎,等大家休息下. 其實,同佢一齊,我真係覺得好開心,一句"我好想見你!",已經可以殺死我.