當我返左香港冇幾耐，有一日，佢突然打電話黎，開頭我唔認得佢係邊
個，後尾佢話比我聽佢係茵茵，佢話應承過我會搵我，所以而家就打比
我喇！而最奇怪既係，果次係我地第一次傾電話，但我對佢一Ｄ陌生既
感覺都冇，我地暢所欲言，感覺好舒服。係暢談中我向佢提議不如出黎
見見面。而佢都好快咁答應左。
過左幾日終於到左約會既前一日，果日我心情已經非常緊張，整日都諗
緊聽日既約會會係點。終於，約定既時刻到喇！果日，我地約左大家係
佐敦果間恆豐中心既門口等。終於，我都見到咁多年來想見到既人喇！
佢比我既感覺唔錯，斯斯文文，個樣好乖乖女。就係咁樣，我地就一齊
過左幾小時既約會。

開頭果個鐘，大家都未見肚餓，所以就決定行陣街先。我地去左Update
Mall，加連威老道，利時，同埋仲去左影卡添！到差唔多八點，我地去
左尖沙咀某一間餐聽度食晚飯。食完飯，我提議去海旁行下，我地一路
行，一路傾左好多野，大家都冇陌生或者唔自然既感覺。行完海旁，我
地仲搭天星小輪去中環，跟住再坐電車去銅鑼灣食糖水。呢幾小時裡面
，我地兩個都過得好開心，好快樂。

自從果日之後，曾經害怕發生既問題，幸好冇發生過（我講既問題係指
大家見面之後會冇野講好陌生）係我臨返溫哥華果個禮拜，我地又出多
次街，我地去左旺角，行女人街，潮流特區，新天地 etc .... 跟住我
地去左九龍灣既德福商場，我地去左果度間遊戲機中心玩，玩得好開心
，大家都比上次約會更加熟同埋更加輕鬆。跟住我地去左陶大既一間韓
國燒烤度食晚飯。食野果陣我地無所不談，又講東，又講西。真係唔似
只係見過兩次面咁少。到我臨上機果日，佢打左個電話比我祝我一路順
風，同埋我地相約好我落機之後會online傾計。就係呢兩次既約會，令
到我地兩個之間既友誼，跨進左一大步。