智鴻之
十大「一堆男人會做的事」（預告篇）

1. 賭，估要係豪賭。豪唔係淨係一擲千金，估要講盡，一賭就要賭到盡，唔理係賭命定賭花生，都一定要去盡。正所謂賭神話：「曬冷！」

2. 講女人。無論係講樓下Ｂ座果件豬扒，定係講公司入面果班ＯＬ，都會講到眉飛色舞。因為講Ｄ自己永遠唔會得到既野，或者係永遠唔會要既野，係唔會有壓力既。

3. 講自己的女人。同講女人的分別是，講自己的女人永遠都會講到萬念俱灰或是怒不可遏咁，同一道理，講Ｄ自己永遠都要擁有既野，或者係永遠唔想要但又冇得唔要既野，係有好大壓力既。

4. 睇波。唔理你識唔識睇，有波係個電視上面男人就會望，望望下就會睇，睇睇下就會捧。未必場場都睇得明，就算睇得明都唔敢講，怕講錯左會比人笑足九世，到時睇下你仲敢唔敢講乜野係「得益規條」。

5. 嫖。嫖都有真假之分，依度講既係假果隻。真果隻通常都會單獨行動，假果隻．．．你今日睇左未呀？

6. 酒。唔知幾時，酒唔再係一支支，而係一round round。好似講心事咁，都係一round round，你講完，下round就輪到佢講，有幾多心事就講幾多round。講完就散，好似飲酒咁，一覺醒來，就當乜事都冇發生過。

7. 打交。真的，有邊個男人未打過交？打交有時係為啖氣，可以係公司受既氣，或者係同事放既屁，甚至係喝完氣水果一下都得。唔講你唔信，就係咁簡單。

8. 講政治。政治可以包含好多野，辦公室裡有政治，屋企都有，唔洗一定要講下一任特首係邊個，講下下一任老婆係邊個都係差不多：咪又係得佢一個？

9. 打機。打機係個老少咸宜既活動，因為佢可以幫你實現一Ｄ你冇可能實現既願望，例如可以一口氣追到十個可愛女孩，做勇者拯救世界等等。最重要就係，打機可以唔洗現實咁，要負責任。

10. 講電腦。男人最權威既知識，唔係女人唔識，係女人唔想去識；搵樣人地唔鍾意既野去做權威，男人，你係得既！