Ｓｔｅｐｈｙ：你知唔知鍾意一個人既感覺係點架？ ！

森美：知．．見唔到佢個心會囉囉亂．．見到佢個心又會卜卜跳，
同佢傾計明明開大冷氣都會成頭大汗，
想開口約佢去街， 但係講完Ｈｅｌｌｏ又唔識講落去喇．．．

Ｓｔｅｐｈｙ：嘿．．傻瓜．．呢Ｄ都只係算岩岩鍾意啫，真正鍾意一個人，唔係咁架！

森美：咁係點呀？

Ｓｔｅｐｈｙ：等我講比你聽啦．．

愛一個人，你會將所有最好既野都留番俾佢；你睇過一本好好睇既小說，你會專登買多一本，等佢悶既時候攞俾佢睇；你食過一件好好味既Ｃｈｅｅｓｅ Ｃａｋｅ，你會記住果種味道，等佢得閒既時候整俾佢食；你睇緊一部好好睇既電影，明明睇到一半，你都會離開戲院，因為你想佢陪自己再入場睇埋個結尾．．．

森美：咁做妳男朋友都幾幸福丫，但係講左咁耐都未見佢黎接妳既？

Ｓｔｅｐｈｙ：我同佢分左手半年喇．．．

曾經有個女仔，佢教我鍾意一個人應該係點，佢話．．你越去愛一個人，越會好快咁冇左自己；佢仲話．．自己唔會再鍾意人，因為佢唔想再每段感情既結局．．都係一無所有；但係，我好有信心咁話俾佢聽，妳下一段感情既結局，一定會好幸福、好快樂！ 佢聽完，好唔相信咁望住我，問我點解．．我鼓起勇氣同佢講．．因為我鍾意左妳！