晚上十時半，半躺在床上的我正在發呆。
『如果有左一份穩定既工作之後，你仲想要D咩？』我問了坐在電腦檯旁正在玩著ICQ的亞妹一個問題。
「梗係一世唔使做啦！」亞妹想也不想便回答我。
『你唔好亂講啦，認真D答我啦。』我轉了轉身，面對著她說。
「你先係度亂諗呀！無啦啦問埋D咁既問題！」妹妹望了望我說：「亞哥，有工番係唔係應該慶祝？」
『咁又點？』我狐疑地問。
「我有D肚餓…」她笑著說。
『咁又點呢？』我再問。
「請食糖水！」她忽然大叫起來。
『下？』我來不及反應，她已經一溜煙走出客廳大聲叫嚷著，「亞爸亞媽！亞哥話佢今日番工好開心，所以而家想落街買糖水請我地食呀！好野！」
一陣陣的腳步聲隨之而來，我無奈地躺在床上。
「係唔係呀？朱仔，我要碗黑白。」亞爸用手按著房門說。
「花生糊丫亞仔。」亞媽抱著亞爸的腰說。
「亞哥，紅豆沙唔該！」當然少不了亞妹的份兒。
『好吧！』我笑笑口地翻身跳下床，從手提包裡拿出了銀包，穿上了拖鞋，乖乖地走出門口去。走的時候我拍了亞妹的頭一下，她只是笑嘻嘻地伸了伸舌頭。

對面街的轉角有一間糖水鋪叫「好記」，亞爸後生的時候已經開始營業，是這裡的「老字號」。
我們一家人一星期總有光顧一兩次，附近的街坊都經常來買外賣，因為這裡的黑白和花生糊非常出名。
除了糖水，我也很喜歡這裡的老板，因為他十分熱情，常帶著笑容，而且總會記得我們一班街坊的名字。
他已經是「好記」的第二代老板了，他的亞爸在半年前退休了，但經常在這裡都會發現這位老先生的影蹤。
「喔！咁夜呀朱仔，今日食咩？」老板見我步入鋪頭，雖然雙手正忙著煲糖水，但他仍然笑著歡迎我。
『一碗黑白、兩碗啡、一碗紅。』鋪頭裡似乎有四五個街坊左等著外賣。
「好！你坐陣先！」他一邊說，一邊擦著頭上流著的汗水。
我背靠門口的一張桌子旁站著，呆看著老板勤快地將熱騰騰的糖水一兜一兜的倒在膠兜內。忽然一個身影在我眼前略過，一把少女的聲音傳入我耳中，「老板，兩碗綠豆沙，一碗芝麻糊。拎走丫唔該。」
那個少女纖瘦的身影吸引了我的視線，短短的頭髮，T恤短褲，還有一陣淡淡的洗髮精香味。
「好！小姐你坐陣先！」那老板露出一樣的熱情的笑容，雙手依舊不停地忙著。
「哦。」那少女回答。
『哦？』她說的這個「哦」字十分耳熟，在哪裡聽過呢？『Stephanie？』猶豫地想了一陣子，我不禁叫了出來。
「呀？」那個少女訝異地轉頭看著我，我身體不由自主地震了一下，真的是她！