本來打爛o野要賠錢天經地義，不過太子有間食店設局屈客賠償，認真衰到無人有。上星期四，我和朋友到太子的＜小城故事食飯，估唔到間店會咁賤格，用掂一掂都會斷開的坐檯夾夾住晚餐餐牌。我o地不虞有詐，單手拿起餐牌時坐檯夾已應聲斷開。

當時店員好耐心等我地Order， 兼且出埋單據（唔食都要畀錢），然後至反轉坐檯夾的底部，原來寫有：如有損壞照價賠償＄２０。原來之前有唔少人，不幸中了＜小城故事＞布下的陷阱而被屈賠錢，今次間店擺明知道坐檯夾易爛，存心呃人錢。我o地當時有理論，話個杯都容易打爛，又唔見你o地貼住打爛杯要賠償。店員自知理虧，唯有發惡話總知唔賠錢，唔使旨意離開。

其實賠錢事小，我o地唔滿意係店員o既態度，最火滾係從來未見過一間食店，屈完客賠錢，仲在旁邊出言單打，兼夾講難聽的人身攻擊，慌死我o地同其他客人聽唔到。話晒我o地入來幫襯，又唔係乞食借錢，只不過錯入黑店慘受氣。不過當時鄰近油尖旺，龍蛇混雜，你估唔怕畀人斬o羊，可以做的是忍氣吞聲。

最後，我o地為求自身安全，揚言會打９９９報警求助。店員可能怕驚動警方，在一遍粗口聲中讓我們離去。雖然堅持之下，毌須賠那廿蚊，只畀飯錢，但今餐飯我明白咩叫 " 背脊骨落 "。