一九九五年十一月份第一次踏入黃竹坑警察訓練學校,旅遊巴徐徐駛進校內操場,只見操場上一個個身穿制服教官手持一個黑色幼長指揮棍行近旅遊巴旁,當旅遊巴一停定後便大聲哮叫:”夏令營呀?重唔快XD落車!”哈!你班友真攪笑!嚇鬼呀?嗌兩聲你估我就”凹水”扮綿羊,當然啦,你班友想訓練前先個下馬威,我無理由重咁勇做靶架,唯有誠惶誠恐手挽兩個紅白籃袋落車走到操場等叫名,我被編到A座宿舍近”順泰園”Canteen,好極!!方便夜晚偷偷竄落去買野食^^

半年學堂生活就好似做纖體公司代言人一樣咁過癮--有人出$幫你減肥,邊度搵呀?每日行程緊密程度會以為自己參加法國巴黎水貨團,而第一次體能測驗結果除了我外尚有幾名同僚肥佬(主要衰跑步),肥佬自然要大懲罰,響固定課程後自動波走去球場,會有一個退役SDU等緊你請你食一個加強體能套餐,每次都唔同款令你樂而忘返省唔起自己係邊個至肯罷休,若果下次考試咁不幸合格的話,sorry!你就無緣份食呢個肥雞餐,幸運地本人3次體能測驗都肥響跑步度,都唔知有無攪錯,每次都將跑步限制時間提高,由初初12分30秒跑畢2.4公里提高至10分30秒就要跑完,黐孖筋!!我超出18秒都唔肯俾人過骨,結果臨畢業重要同班新仔食肥雞餐,幾瘀…重話要我重考,傻傻地!我都畢業,搵日啦!

每逢落雨天我都會擔杷遮(光明正大)從正門走出學堂去香港仔睇戲,打機或買日用品,守門口班友仔你估識晒學堂所以人呀?有D唔知重俾禮我叫我亞Sir添呀!不過上得山多終遇虎,有次偷走返入學堂途中,就響A座宿舍留下撞到教自己班教官,突擊檢查”斷正”….無計!好彩我除跑步外,法例,槍械,模擬處境應變都係頭幾名至無被革扯…個教官重響教法例堂上講:”我真係想X你兩句,但你成績又好過其他人,我都唔知點X你好”哈!有時真係唔到你唔信,只要交足功課做好本份確實有少少數.

學堂生活最難忘唔係打架,唔係幾條麻甩佬暱響間房睇咸書,或者係某次行經女警宿舍見班女警無落簾住Bar周圍走,而係預備畢業操,風雨不次練習303(有刺刀長槍)因為這意味我將離開可愛學堂獨立面對外邊複雜社會------做一個真正既差人(市民眼中既超人).