每星期有4日，我地都會去同一個地方，我去既原因有一半係為自己，有一半係為左佢，我知如果我去，佢就可以有著數‧而為左自己個一半就係可以減肥同見到佢‧我知我好傻，為左一個唔鍾意自己既人而咁做，我只係想開心姐，唔通咁都唔得?
每次聽到佢話搵唔到女朋友，我個心都好痛，其實佢搵唔到女朋友我應該開心先岩，但係我只係覺得"心痛"‧我心痛係因為我唔想見到佢唔開心，我知佢好想搵個女朋友，我知佢其實好孤獨，好寂寞‧我心痛係因為點解我唔可以做佢女朋友，唔通我真係好差咩?我真係唔值得你去愛我咩?
你成日都問我點解你媾唔到女‧你又話係你個樣既問題，你的而且確唔係一個靚仔，但係你係我心目中就係有一種好特別既感覺，令到我鍾意左你‧有時唔係一定靚仔先可以媾到女‧
5月12日，(星期一)我又去個地方，我搭巴士去到銅鑼灣，一落車就打電話比佢，點知打唔通，咁我咪去佢公司搵佢囉，當我就黎行到佢公司個時，我見到佢，佢仲同2個人一齊，我咪費事叫佢囉，我自己去左個個地方先，諗住佢有野做，佢一陣會去搵自己啦，點知佢個日冇去到搵我，連一個電話都冇，打個電話話比我知，佢今日唔去，都唔係好麻煩姐，唔通我連做佢朋友都冇資格....