Chris - 20歲，城大 CS year 1 degree 學生，故事第一身主角

佩雯 -- 21歲，又一城麥當奴收銀

阿Sam -- 20歲，城大CS year 1 degree 學生，Chris的好友

阿May -- 20歲，教育學院year 1 學生，Chris 的女朋友



【第一章 . 今非昔比】

…同阿May一齊已經有2年幾了，她很好，對我十年如一日都咁好．同佢一齊，我有一種好自然舒適的感覺；雖然佢樣貌不算很美(身材也…)、有時又會好野蠻、甚至常常為小事而嗌交，但我地都依舊在一起，因為大家都唔會捨得分開…

不過，感情淡了，就是淡了，呢個係不爭的事實．最近，我每次陪阿May行街shopping，當我呆站在店鋪外等她買衫，我甚至會認為是在浪費緊自己時間…曾幾何時，我會跟埋入去幫眼揀衫，當她心滿意足買到心頭好，或是我俾錢買來送給她時，阿May欣喜的笑容總會令我也一樣雀躍．可是…昨昔已不復再了……



【第二章 . EEC . 又一城 . 麥當奴 . 佩雯】

踏入sem-break，我同阿Sam每日都要番CityU上EEC（English Enhancement Course） intensive course，好慘!!阿Sam係我大學中最要好的朋友，由一註冊入學後就認識，一齊讀地獄式Summer EEC，一齊慘慒變態Miss蹂躪，可謂一齊共過患難．我地好多時都會一齊，可能佢性格較為被動啦，我有時會不知不覺咁好似個大哥哥咁照顧佢．佢成日同我講佢未拍過拖，好羡慕我有girlfriend，所以我成日都諗：做死黨的，有好野一定會帶揳你o既，放心啦！

Sem-break的某一天，２點半上完EEC，阿Sam冇陪我食lunch，阿May又唔得閒陪我，所以要食自己…雖然好肚餓，但我無在canteen解決，因為我諗起那些令人作嘔的$10飯就制止了自己…當我餓到身體都唔受自己控制的情況下，我行到去又一城的麥記．就在那裡，我遇見了她……佢係一個麥記收銀，我第一眼見到佢，只係覺得佢好新面口，身邊又有個阿head教緊佢點做點做，想她必是新來的(其實我同阿Sam每日o既lunch唔係canteen就係麥記)．我排了她的counter，當輪到我落order時，終於近距離睇清楚佢，中長頭髮，幾靚幾有氣質，係麥記唔可能搵到既貨色…我突然有種心動的感覺，呢種感覺，我以前同阿May都有過．在短短的落order過程中，我地好似有特別多的眼神交流咁…我感覺到，呢種對望，唔單止係Sales同顧客之間的眼神接觸咁簡單……

當晚臨睡前，我不斷諗番起麥記個女仔，忽然有一種好想再見到佢o既感覺．不過，我同自己講：你有阿May架喇!!……所以我無再諗落去，一心去搵「周公」…可是，在夢中又再見番佢……

第二朝醒來，我不斷問自己：是否對個女仔一見鐘情?　我答唔到自己，但肯定的是，我好想再見到佢．所以，上完EEC後，我再次一個人踏足又一城麥記．今天麥記好似特別少人咁，不論食客或職員都特別比平日少．我直覺話我聽，呢個環境好似係上天刻意安排比我咁…我再次到佢既counter落order，當佢執緊我叫o既巨無霸餐時，我發現仍然無人排隊，於是我鼓起勇氣，主動同佢傾偈…

我：你尋日先黎架？

佩雯：呀…係呀…你點知架？

我：我成日都黎食野架，都未見過你，尋日又有個人在你側邊教你，咪知道咯…你都好快上手喎……

佩雯：係咩…唔係呀…我好驚會成日做錯野架……

我：…你叫咩名呀？

佩雯：…我叫佩雯…你呢？

我：我叫Chris…

唉，辛辛苦苦談了一會就被迫中斷，因為有客要落order，我唯有講話下次再傾過啦。好在，佩雯都微笑地向我道別。

翌日，我又再去麥記搵佢。今次我仲問o左佢的手電號碼……夜晚，我打俾佩雯傾o左一陣，原來佢每日兩點幾放lunch time，而我每日要番去EEC，時間剛剛好，一上完就可以搵佢一齊食飯…但係，我諗諗下，我已經有個好好既女朋友阿May，我愛阿May，佢亦對我好好，我真係唔捨得離開佢，或做出任何有機會導致分手的事情……



【第三章 . 三人行】

於是，第二天我約埋死黨阿Sam一齊去搵佩雯食lunch，雖然佩雯唔可以屬於自己，但都希望阿Sam可以同呢個咁好的女仔一齊，所以我決定撮合佢地……這次lunch(在麥記食)食得好開心，阿Sam對佩雯好有意思，我亦為佢地鋪排好下一次的節目-在AMC又一城睇戲。

睇戲當日，我地三人行，我當然識做地讓佢地兩個一齊行，多點相處的時間。佢地有講有笑，相反我個心就好矛盾，一方面為佢地似乎進展得頗順利而高興，另方個又滿不是味兒。當我地步行到戲院門外的溜冰場時，阿May打俾我，於是我乘機叫佢兩個入埸先(順便坐在一起嘛)，我就裝作要有排講而要遲一會入埸……散埸後，我們沒有著落。佩雯是住太子的，走的時候我示意阿Sam送佢回家。可是，佩雯臨走時望了我一眼，她的眼神…有點點的哀怨，而我個心就好唔舒服……



【第四章 . 佩雯哭了】

過了不久，我又再去搵佩雯食lunch，不過阿Sam今日唔得閒(其實那次看戲後，每晚阿Sam都專程去接佩雯放工)。這天的氣氛好不尋常，差不多全沒對話。到最後，佢終於開口問我，問題係：你係咪有女朋友？ 我奇怪佢如何得知，佢話係看戲當天阿Sam講的，於是我坦白地承認了……這時，佩雯哭了，佢問我 點解當初仲要主動結識佢，看似想追求佢咁，俾希望佢，但之後又將佢推俾阿Sam，係咪想玩佢？抑或是因為阿Sam係好朋友，才幫手追佢？ 我覺得好內疚。我向佢解釋，事實上我真係當初對佢有好感，可惜我已有阿May，如果沒有阿May在先，追佢o既人就唔會係阿Sam，而係我……佩雯這時哭得更厲害，仲一支箭似沖左入麥記廚房…我只有到櫃面，向佢同事講聲我走了……



【第五章 . 失控】

好幾日我也沒有再搵佩雯了。我每天上完EEC，之後都繼續留在CS Laboratory 入面寫我第一個homepage，每晚都寫到9點10點才回家。當我每經過又一城商場，都會不期然想起佩雯。同時，阿Sam同佩雯已經開始左，而阿Sam差不多每晚都會接佩雯放工，真係估唔到個衰仔咁細心……某天晚上，我如常在CS Lab苦幹，整個Lab都好靜，只係得我同一個secure阿嬸……估唔到，呢晚阿Sam無接佢，佩雯竟然一個人來搵我。佢一雙眼水汪汪的，寂寞地、默默地坐在我旁邊，一直陪著我寫homepage。寫左好耐，我唔想佢呆坐咁耐，於是我提出送佢回家，佢點點頭……入時，門還未有關上…我不由自主地…一手將佩雯一擁入懷…我們…激情地擁吻起來了…此刻的我再不能控制自己，不能再抑壓自己對佩雯的愛…而佩雯…佢捉得我好緊…好緊…身也顫抖起來…這一發自內心的擁吻，就好像兩人期待已久一樣…這時，我偷空用手按了6字樓，在6樓外延續我們的纏綿…過了良久，大家都唔願離開…… 我：夜了…….我送你番去……. 佩雯：唔……

我拖著佩雯的手等、搭、出……但當從3M踏出蒙民偉樓門口時，我竟然自然反應地甩開了她的手，我此刻確是極不願意，但我也清楚自己唔想失去阿May和阿Sam，萬一給人撞破了……我感覺到佩雯從剛才的極興奮，在我鬆開她的手後又打回原形，變得失落…在路途上，二人無話……到了佢屋企大門，佩雯回頭，給我送上一個深情的goodbye kiss……之後一連數天，我們都會在夜間到6樓 "一聚"，就像偷情一樣。但是，我這個極重友情的人，竟然撓了老友牆腳，這是我一直都鄙視的惡行啊！



【第六章 . 一腳踏兩船的日子】

這些一腳踏兩船的日子裡，其實並不怎樣好過。我和佩雯每次出街，都不能做最基本的拍拖動作-拖手，只可以像兩個普通朋友一樣並肩而行。我好怕給熟人撞見，暗中告知阿May，然後導致分手……奇怪的是，當我每次和佩雯一起，反而會想起阿May，好想知她在那裡、在做什麼、和什麼樣的人在一起、有沒有和其他男仔……等。唉，我的心亂透了！……佩雯和我一起不久後就沒有再在麥記工作，她說和我這個大學生一起，有點壓力，唔想失禮我喎，所以她決定再重考會考。有一日，佩雯話我知她好鐘意麥記有得換的史諾比公仔，於是，我每日都去麥記買餐去換購，甚至有時同阿May一齊時我都照換，阿May仲笑我男仔人家都去換公仔……



【第七章 . 我呷醋了!!】

某日，我經過阿May樓下附近，竟然見到阿May在麥記裡和另一個男仔在一起！平日的阿May很少自己和朋友約會，她的時間大都花在我身上，和男性朋友一起更是少之又少。反觀現在的阿May，單獨和男仔進餐，有說有笑，那個男的仲幾靚仔添！我好嬲，個心好唔舒服，幾日來都不斷亂諗野：我有外遇，我女朋友都可以有吧，係報應啊！……莫非，心愛的東西總要失去後才懂得珍惜？



【第八章 . 浪子回頭】

情人節當天，我整天的時間都花了在阿May身上，因為我不想她被其他男仔霸佔。當我拆開阿May為我準備的情人節禮物時，我嚇了一跳，是一個史諾比公仔。阿May笑著說：「有一次在你家見到你儲的一set史諾比公仔，發覺漏了一隻，想必是你太忙了，無時間去換吧！所以有日我專程找我的小學同學Simon出來，因為佢在麥記工作，所以我求佢幫我留了一隻你儲漏的史諾比咯！儲公仔儲漏一隻唔好架！」我好感動…真係好感動…仲好內疚…有個對我這樣好、這樣細心的女朋友，我都唔懂得珍惜，仲好唔知足，仲要去搵第二個女朋友…佢對我一條心，我仲要懷疑佢……我感動得落下了眼淚，阿May笑我傻豬。不過我知自己唔傻，仲比以前清醒得多，因為我真正睇清楚邊個才是最重要，邊個才是我的最愛。當晚，我在星空的見證下，向阿May許下諾言，會愛她一生一世！

情人節翌日，我向佩雯提出分手。過程中沒有發生任何抖纏，我奇怪佩雯可以咁放得低…原來，她也忍受不了偷偷摸摸的壓力，而且阿Sam對她很好，她不想再對他不忠……就此，我和佩雯這種不尋常的關係便和平地告一段落。

某天，阿May介紹她那位小學同學Simon給我認識。奇怪地，Simon同我打的第一個招呼就是：嘻，我地見過好幾次了…… 他的表情和笑容很奇怪，像是暗示什麼似的。……事後我問阿May原因，原來Simon是在又一城的麥記做，所以常見到我。我登時\嚇了一跳，更緊張地問：佢有冇講我什麼？ 阿May笑著說：…有…不過…過去o既o野我地唔好再講啦！好肚餓啊，我地不如去食…… 阿May原來一早就知道我和佩雯的事，不過佢依然默默地在我身邊對我好，即使我對佢不忠，佢也大方得體地寬恕了我。試問有一個咁好既女朋友，我又怎能夠唔知足呢？（本故事完）