楊思琦李泳豪地下情曝光
2月 8 星期六 03:00 更新

李家鼎與施明一對孖仔泳漢、泳豪雖然同一胎出世，但追女仔技術各異，哥哥泳漢高調追求Twins阿嬌不遂，弟弟泳豪顯然技高一籌，靜靜地與去屆港姐冠軍楊思琦共墮愛河，在剛過去周三之大年初五，楊思琦還跟隨男友與家人去拜年，儼如一家人般。


楊思琦與泳豪自去年拍攝無新劇《血薦軒轅》生情愫，一齊到北京拍外景時，更有傳思琦連續十日到泳豪宿舍過夜，還公然手拖手，雖然兩人回港後齊聲否認傳聞，但戀情卻繼續發展。

近日兩人都分別要為無拍劇，在大年初五齊齊不用開工，思琦就算患病，都要陪同男友一家人去拜年，這個未來「新抱仔」看來十分識做。

當日下午泳豪負責駕車，載住思琦、媽咪施明與哥哥泳漢，在九龍城出現，當時齊齊陪施明去買生果準備去拜年，買完生果，思琦熟練地坐在司機位旁女主人位置。

就此事致電施明，問她當日跟囝囝與未來新抱齊齊去拜年一事，她說：「日日去街，都唔記得邊日囉。（咁你對呢個未來新抱滿唔滿意？）佢靚女又乖女，梗係鍾意啦，我又無女。（思琦係咪成日都陪你去街街？）我平日好少見，有乜你問我個仔啦！」隨即將電話交給「細孖」泳豪。

泳豪承認感情好

問到泳豪是否已當思琦是一家人，泳豪說：「唔係，好朋友，未係女友住，拍劇日日對住，感情就一定有，但依家大家都忙，都係工作緊要。」

至於下星期情人節，泳豪坦言暫時未有想過會否送花給思琦，他說：「都唔知日使唔使開工，所以都未諗過送花，總之係時候就會公開。」而楊思琦因為正拍攝新劇《英雄、刀、少年》，至截稿時仍未回覆。
yahoo.com.hk