阿倫克勤台上勁寸余文樂
2月 3日 星期一 03:00 更新

譚詠麟和李克勤前晚大年初一假紅館舉行「左麟右李演唱會」首場演出，唱足三個鐘，氣氛熱烈，全無冷場，尤其是棟篤笑一part，他們和嘉賓梁榮忠一唱一和寸盡圈中新人，仲要當住台下的余文樂面「玩」他和陳冠希撞膊事件，搞到阿樂初則尷尬繼而狂笑，觀眾更加捧腹。

冇挖苦成分

首先由梁榮忠發炮：「聽講陳冠希同余文樂講：『垃圾獎使乜笑得咁開心。』跟住就互相F……U……F……U（粗口諧音，指他們粗口互罵）。」克勤即搭嘴：「佢係好朋友生死之交，陳冠希搭住余文樂膊頭，銀包張相出講：『垃圾池影垃圾相咁開心。』余文樂反問陳冠希，讀邊間U（大學）？陳冠希就答：『F……U佛羅里達州大學』。跟住陳冠希問番轉頭……」阿倫搶說：「我知，余文樂答：『我係福建人，讀福建U，Year 1（一年班）。」

阿倫和克勤仲雙雙舉起食指，取笑傳聞余文樂在事件中做中指粗口，克勤還大唱《I ……F……U More》，認真抵死。事後阿倫接受訪問時說：「新年玩，唔係擺上，冇挖苦成分，娛樂圈咁都唔玩得，盞搞。」
Yahoo.com.hk